2/2/2024

九龍華仁書院，將會今年舉辦建校一百週年校慶活動，我諗到時一定好熱鬧，好高興，我自己唔能夠參加，但喺呢喥獻上多少資料.

我在臉書見到幾張九華照片，特別有一張係九華喺旺角嘅舊校校舍，後來改做德仁書院。

嗰座就係我進入九華時嘅校舍。本來我想借相用，但唔知邊個係物主，冇辦法去打個招呼借用，所以冇相！

舊九華校舍建築物喺旺角兩條街交界之處：通菜街與乃路臣街。

正門望出，向住外面，右邊係通菜街，今日變成「女人街」，擺滿各式各樣女士及其他用品嘅攤檔，我都去過買嘢。

當日冇呢啲攤檔，但係早晨有好多苦力，等待僱主嚟招請臨時散工，雖然人多，但秩序聲響還好，不致騷擾我哋學生上課！

校舍右邊係乃路臣街，如果喺彌敦道巴士站落車，通往德明中學，諸聖堂中學等，學生要靠乃路臣街！

中午時份有不少女中學生經過嗰條街返學，我哋一班頑皮仔，就企喺二三樓騎樓，大聲吹口哨表示欣賞，呢女仔當然唔啋我哋，我都學識，將手指屈曲放入口中，吹得好响，過癮！

學校冇運動場，麥花臣球場係唯一運動場，其實係沙地一塊，人頭湧湧，無數人一齊踼波.

聯想起有一件小事：我記得40年代尾九華恢復教授學生，有夜校，我家中比較年長兄姊，夜晚參加英文班，有一晩我跟去，當然不知所謂，但係記得有一位老師到課室，對學生話學校需要枱椅，接受捐贈！